Quali fini maliditta
vinni a fari na muschitta,
ia vulannu assai cunfusa
e finì nta la me zzusa
ora sugnu nguttumatu
picchì già l'avia paatu,
chist'azzusa a mia vinnuta
s'apparà la so caduta !
Cu lu cori ancora amaru
iu ci dicu all'azzusaru:
si la vista nunn'è nfusca
nta st'azzusa c'è na musca !
Si ci parti l'azzusaru :
nun parrari a cori amaru
nta stu nicu bicchireddu
t'aspittavi lu viteddu?
Nun nascivi l'atra aeri
e canusciu u me misteri
sta parrannu cu disprezzu
di st'azzusa e lu so prezzu !
Accussi nni mia si usa
pi cu accatta la me zzusa:
c'è la musca o c'è l'ariddu
lu so prezzu è sempri chiddu !
(Ezio Spataro)
